పద ఝరి వేటూరి

వేటూరి గారి స్మృత్యర్ధం




తెలుగుపాటను కొత్త పుంతలు తొక్కించిన కలం ఆయనది. తెలుగు మాటను మురిపించి, మైమరిపించిన పద ఝరి వేటూరి. ఆయన లేని లోటు తెలుగు మాటకు, పాటకు, భాషకే తీరనిది. ఆయన కలం బలం అంతటిది. ఆయన భావజాలం అంత గొప్పది. ఆ కలానికి అడ్డులేదు. భాషాపరమైన అవరోధాలూ లేవు. అందుకే ఎలదేటి పాటలా సాఫీగా మూడున్నర దశాబ్దాల పాటు అవిశ్రాంతంగా సాగిందా సిరా. ఆయన పాటలో తత్వం పలుకుకుంది. అరమరికల్లేని ఆనందం పరవశిస్తుంది. శృంగారం పరవళ్లు తొక్కుతుంది. విరహమూ వీరంగం చేస్తుంది. ఒక్క మాటలో చెప్పాలంటే.. వేటూరి కలం పడితే కలకలమే. భావ ప్రవాహమే. ఎలాంటి భావ లోతులకైనా ఆయన కలం వెళ్లగలుగుతుంది. ‘సిరిమల్లె పువ్వా’ అంటూ పలుకరించిన ఆ తెలుగుదనం ‘కోకిలమ్మ పెళ్లికీ కోనంతా పందిరీ’ అంటూ అడవికీ కోకిలమ్మకు మధ్య ఉన్న ప్రకృతి సంబంధిత అనుబంధాన్నీ హృద్యంగా ఆవిష్కరించింది. అదేపాటలో చిగురాకులనే తోరణాలుగా చేసి చిరుగాలుల్నే సన్నాయిగా మార్చిందా కలం. అందుకు భాషాపరమైన పట్టుమాత్రమే ఉంటే సరిపోదు. భావస్ఫోరక ప్రయోగమూ అవసరమే. అలాంటి ప్రయోగాలెన్నింటినో వేటూరి చేశారు. ‘వేట నాది వేటు నాది వేటాడే చోటునాది’ అంటూ భక్తకన్నప్ప చిత్రంలో ఆయన చేసిన పద శబ్ద ప్రయోగం మనస్సును పులకింపజేసేదే. సందర్భాన్ని బట్టి భావలహరిలో ఎంతలోతుకైనా వెళ్లగలిగే ‘పాట’వం వేటూరిది. అందుకే ఆయన తెలుగుదనానికే కాదు తెలుగు పాటకూ చిరునామా అయ్యారు. తొలి పాట రాసిన ఓ సీత కథ నుంచి ఆయన ప్రతి పాటకూ తెలుగు ప్రేక్షకులు పట్టంగట్టారు. ఆయన విరుపులకు, విసుర్లకు ఉప్పొంగిపోయారు. పదాలను పరుగులు తీయించడంలో తనకు తానే సాటి అనిపించుకున్న వేటూరి ఆ తరహాలో ఎన్నో వేల గీతాలను హృదయాలు పరుగులెత్తించేలా రాశారు. చిన్న మాటల్లో నిగూఢ అర్థాన్ని చెప్పగలిగిన ఆత్రేయ స్థాయిలో వేటూరి విరచిత గీతాలెన్నో ఉన్నాయి. ‘చిన్నమాట ఒక చిన్న మాట’ అంటూ ఆయన అలతి పదాలతో రాసిన పాట సైతం విశేష ప్రాచుర్యాన్ని చూరగొంది. వేటూరి అంత తేలిక పదాలతో అంత సునాయాసంగా, సునిశిత భావంతో పాటలు రాయగలిగారంటే దాని వెనుక తెలుగు భాషను ఔపోసన పట్టిన అనుభవం ఉంది. తెలుగు పదం ఎంతగొప్పదో అధ్యయనం చేసిన కృషి ఉంది. అన్నింటికీ మించి సమాజాన్ని లోతుగా చూసిన, మనస్తత్వాన్ని కోణాల్లోనూ స్పృశించిన అవగాహనా శక్తి ఉంది. అందుకే వేటూరి పాటలో సజీవత్వం కనిపిస్తుంది. ఆయన పాటలోని సందర్భోచితమైన భావ పరంపర పదపదంలోనూ ద్యోతకమవుతుంది. మూడున్నర దశాబ్దాల పాటు సాగిన వేటూరి గేయరచన ఎక్కని పుంతల్లేవు. ఆయన అందుకోని భావ శిఖరాల్లేవు. ఆయన కలం శృంగారాన్నీ పండించింది. వయ్యారాన్నీ ఒలకబోసింది. అద్వైతాన్ని ప్రబోధించింది. తెలుగుదనానికి నిండైన చిరునామా ఆయన పాట. మాటలకందని భావాలనెన్నింటినో తన పాటల్లో పరంపరగా పొదివారు. తెలుగుపదానికి ఎన్ని అర్థాలున్నాయో.. అన్నింటిలోనూ అందెవేసింది కలం ఆయనది.
తెలుగు పాటకు తొలి నాళ్లలో తాత్విక కోణాన్ని అందించిన ఘనత సముద్రాల వారిదైతే, దాన్ని మరింత ముందుకు తీసుకెళ్లి సరళపదాలతో ఘనమైన అర్థాలనందించిన పాటవం వేటూరిది. దేనిపైనైనా పాట రాయగలిగే పదాల పందిరి ఆయన మనసు. దానికి సందర్భానుసారం స్పందించడం తెలుసు. ఆ స్పందనలో తెలుగు తీయదనాన్ని ఎలా అందించాలో తెలుసు. ‘రాలిపోయే పువ్వా నీకు రాగాలెందుకే’ అంటూ భావలోతులకెళ్లిన ఆయన ‘వేణువై వచ్చాను భువనానికి, గాలినైపోతాను గగనానికీ’ అంటూ ప్రేక్షకుల గుండెలను ఆర్ద్రతతో పిండేశారు వేటూరి. పదాలందరికీ తెలుస్తాయి. భావ గర్భితంగా, భావస్ఫోరకంగా వాటిని సందర్భాన్ని బట్టి అందించడంలోనే గొప్పతనం ఉంటుంది. ఆ గొప్పతనం వేటూరి సొంతం. అందుకే వేటూరి పాట తెలుగుదనానికి ప్రతీక. తవ్వేకొద్దీ వేటూరి పాటలో కొత్త భావాలు పుట్టుకొస్తాయి. కొత్త అర్థాలు సాక్షాత్కరిస్తాయి. అందుకే ఆయనది తెలుగు పద ‘పాట’వం. తెలుగు పాటకు సాహితీ గౌరవాన్ని తెచ్చిన తేజం. తెలుగు మాటకూ ఉత్తేజం.

అమర గాయకుని అర్ధాంగి

ప్రతి మగవాడి విజయం వెనక ఓ స్త్రీమూర్తి వుంటుంది అన్న మాటకు అక్షరసత్యంగా నిలిచినవారు సావిత్రమ్మ. గంధర్వ గాయకుడు ఘంటసాల వెంకటేశ్వరరావు అర్ధాంగిగా ఆమెకు కళాలోకం నీరాజనాలు పడుతోంది. మహాగాయకుడు ఘంటసాల వారి సతీమణిగా, అద్భుత గాత్ర పరిమళానికి ప్రధమ శ్రోతగా, ఆయన తదనంతరం ఆయనకు దక్కాల్సిన సన్మాన సత్కారాలన్నీ అందుకుంటూ, తన భర్తను నిత్య వసంతునిగా చేస్తున్నారు. ఆంధ్రదేశంలో ఘంటసాల గానామృతాన్ని సేవించనివారు వుండరు. పాడితే ఘంటసాలే పాట పాడాలని సువర్ణ్ధ్యాయంగా భావించే పాతతరం చిత్రాల్లో పట్టుపట్టి మరీ ఆయనచే పాడించేవారు. నిరంతరం రికార్డింగులు, మ్యూజిక్ సెట్టింగ్‌లు వగైరాలతో తిరిగే ఆయన్ను కంటికి రెప్పలా కాచుకుంటూ ఆరోగ్య విషయాలపై శ్రద్ధ వహిస్తూ ఆ అమృత గానఝురిని నేల నాలుగు చెరగులా ప్రవహించడానికి తనవంతు ప్రయత్నంగా కృషి చేసిన సావిత్రమ్మ జీవితం ధన్యం. అటువంటి వ్యక్తిత్వాన్ని ఘంటసాల అభిమానులకు పరిచయం చేస్తుందీ గ్రంథం. ‘అమరగాయకుని అర్థాంగి’ పేరిట శ్రీమతి ఘంటసాల సావిత్రి జీవిత ప్రస్తానాన్ని చూపుతుందీ పుస్తకం. ఘంటసాల గానసభనుండి వెలువడిన ఈ గ్రంథాన్ని డా.కె.వి.రావు రచించారు. ముందుగా ఘంటసాలవారి వాక్కుకు వున్న శక్తిని తెలియజేసారు. ఆయన ఏది మాట్లాడితే అది జరిగేదట. భవిష్యత్తులో తనలా పాటలు పాడే గాయకులు తెలుగు సీమలో పుట్టి, గానకళను అజరామరం చేస్తారని ఆయన ఆనాడే ఊహించారట. ఆ నోటి చలవనే నేటి కాలంలో ఎంద రో గాయకులు ఆయన పాటలు పాడి జీవితాన్ని ఆనందమయంగా తీర్చిదిద్దుకుంటున్నారు. అటువంటి గాత్రం మరి ఇంతవరకు రాలేదని పరిశీలకులు నిర్ణయించారు. తన తరువాత వారసుడు ఎస్.పి బాలు అని ఆనాడే ఘంటసాలవారు సెలవిచ్చారు.
భారత ప్రభుత్వం ఆయన గౌరవార్ధం ఓ తపాలా బిళ్లను ముద్రించింది. ఇది ఏ సినిమా గాయకునికి అందని అరుదైన గౌరవంగా సావిత్రి వివరిస్తారు. ఘంటసాల తదనంతరం చిన్నపిల్లలతో ఆర్థిక ఇబ్బందులు పడుతూ, ఆమె తర్వాత ఓటమి అంగీకరించరాదని వారి పాటలతోనే స్ఫూర్తి పొందారు. అప్పటికి ఎన్ని ఇబ్బందులు వున్నా, ఎవరినీ చేయిచాచి అడగని మహా వ్యక్తిత్వం ఆమె సొంతం. అనేకమంది రాజకీయ నాయకులు, కవులు, కళాకారులు ఆయన వున్నప్పుడు నిత్యం ఇంటికి వస్తూనే వుండేవారు. వారందరికీ తాను అతిథి సత్కారాలు చేయడం అదృష్టంగా భావిస్తారామె. స్వాతంత్య్ర పోరాట కాలంలో బ్రిటిష్ ప్రభుత్వానికి వ్యతిరేకంగా పాటలు పాడారని, ఘంటసాల మాస్టారును జైలులో పెట్టారు. ఆయన తదనంతరం భారత ప్రభుత్వం స్వతంత్ర వీరులకు ఇచ్చే సదుపాయాలన్నీ సావిత్రమ్మకు కలగజేసింది. ఆయన పాటలనే స్మరించుకుంటూ పిల్లలను పెంచి పెద్ద చేసారు. కష్టసమయంలో ఎవరూ ఆదుకోకపోయినా, అభిమానుల అండతో జీవితాన్ని ఒడిదుడుకులు లేకుండా ఈదుకొచ్చారు. అవసరాలకు మద్రాసులోని ఇల్లు అమ్మితే అభిమానుల్లో ఓ వ్యక్తి ఐదు లక్షలు ఇచ్చి మళ్లీ ఆ ఇల్లువెనక్కి ఇప్పిస్తానన్నా ఆమె వారించారు. తనతోపాటు ఎంతమంది గాయకులున్నా, వారికి మంచి అవకాశాలు రావాలని అభిలషించేవారు ఘంటసాల. ఆ కోరికను అలాగే సావిత్రమ్మ కూడా కొనసాగించారు. నూతన గాయకులు ఘంటసాలను దైవంగా భావించి, ఇప్పుడు అనేకమంది రియాల్టీ షోలలో ప్రేక్షకుల ముందుకువస్తున్నారు. వారందరికీ తన ఆశీస్సులు అందిస్తున్నారు.
ఘంటసాల అభిమానులు అనేక పట్టణాలలో గానసభలు ఏర్పాటుచేసి పాటలను వినిపిస్తున్నారు. దానికి వెన్నుదన్నుగా ఆమె ప్రోత్సాహం అందిస్తున్నారు. ఓ మహామనిషిలో అర్ధ్భాగాన్ని పాఠకులకు పరిచయం చేయడంలో ఈ గ్రంథం తనవంతు ప్రయత్నాన్ని చేస్తుంది. ముఖ్యంగా రచయిత ఘంటసాల అభిమాని కావడంతోఈ గ్రంథానికి తావి అబ్బి, గంధర్వలోక పారిజాత పరిమళం అబ్బింది. ఇప్పటివరకు ఘంటసాల పేరుతో ఎక్కడెక్కడ ఏఏ కార్యక్రమాలు జరిగాయి, కళాపీఠాలు స్థాపించి ఎవరెవరు ఆయన బాటలో సాగుతున్నారు తదితర విషయాలు ఆహ్వాన పత్రాలతో సహా ముద్రించారు. అక్కడక్కడ విషయానికి తగ్గట్టు అరుదైన మంచి ఫొటోలు అందించారు. పుస్తకంలోని కాగితం క్వాలిటీ బాగుండి రచయిత శైలి చదివింపచేస్తుంది. అన్నింటితోపాటు సావిత్రమ్మగారి స్వగతంగా ఇంటర్వ్యూ కూడా ఇచ్చారు. ఘంటసాల అభిమానులందరూ చదవదగ్గ పుస్తకం ఇది. తన భార్య దృష్టిలో ఆ అమరగాయకుని మూర్తిత్వాన్ని దర్శింపచేస్తూ సాగిన ఈ రచన, సినీ ప్రియకులకు అలనాటి విశేషాలను అందిస్తుంది.

యాభై వసంతాల ‘పెళ్లి కానుక’

29-4-1960 విడుదలయిన పెళ్లికానుక యాభైఏళ్లు పూర్తి చేసుకున్న సందర్భంగా...



తొలి తెలుగు టాకీ రూపొందించిన 1931లోనే జన్మించారు దర్శకులు సి.వి.శ్రీధర్. మొదట నాటక రచయితగా పేరుపొంది, తమిళ చిత్రం ‘రక్తపాశం’ ద్వారా రచయితగా సినీ రంగంలో ప్రవేశించారు. ఆయన ప్రతిభను గుర్తించిన అన్నపూర్ణా పిక్చర్స్ అధినేతలు అక్కినేని, దుక్కిపాటి మధుసూధనరావు వారి ‘తోడికోడళ్ళు’ తమిళ వెర్షన్ ‘ఎంగల్ వీట్టు మహాలక్ష్మీ’లో మాటల రచయితగా అవకాశం ఇచ్చి ప్రోత్సహించారు. శ్రీధర్ తొలిసారి స్వయంగా కధ, స్క్రీన్‌ప్లే రాసి దర్శకత్వం వహించింది ‘‘కల్యాణ పరిసు’’ అనే తమిళ చిత్రానికి. ఈ తమిళ చిత్రంలో హీరోగా జెమినీ గణేశన్, అతిథిపాత్రలో అక్కినేని నటించగా, తెలుగులో పెళ్లికానుక పేరుతో తీస్తే దాంట్లో హీరోగా అక్కినేని నాగేశ్వరరావు, అతిథి పాత్రలో జగ్గయ్య నటించారు. దీని హిందీ వెర్షన్ ‘నజరానా’లో హీరోగా రాజ్‌కపూర్, అతిథి పాత్రలో జెమినీ గణేశన్ పోషించారు. మూడు భాషల్లోనూ ఈ చిత్రం విజయ దుందుభి మ్రోగించి, దర్శకునిగా శ్రీధర్‌ను అందలమెక్కించింది.

కథాంశం: మాలతికి గీత, వాసంతి ఇద్దరు కూతుళ్ళు. తండ్రిలేని సంసారం, గీత కుట్టుమిషన్ ద్వారా కుటుంబాన్ని పోషిస్తూ, చెల్లెలు వాసంతిని బి.ఎ చదివిస్తుంటుంది. భాస్కర్, వాసంతి కాలేజీలో సహాధ్యాయులు. కాలేజీ ఆటలపోటీలనుంచి వాసంతి ప్రేమలో పడ్డ భాస్కర్ వ్రాసుకున్న ప్రేమలేఖ బయపడడంతో ప్రిన్సిపాల్ అతన్ని కాలేజీ నుంచి, హాస్టల్ నుంచి సస్పెండ్ చేసారు. స్నేహితుడి సాయంతో ఉద్యోగం సంపాదించి, వాసంతి వాళ్లింటి మేడపైన రూమ్‌లో అద్దెకు దిగుతాడు. వాసంతి, భాస్కర్ ఒకరినొకరు ప్రేమించుకుంటారు. ఈ సంగతి తెలియని గీత, భాస్కర్‌ను ప్రేమిస్తుంది. అక్కపట్లగల ప్రేమ, కృతజ్ఞతల కారణంగా వాసంతి తన ప్రేమను త్యాగంచేసి, భాస్కర్‌ను ఒప్పించి గీత, భాస్కర్‌ల పెళ్లి జరిపిస్తుంది. తల్లి మరణించటంతో అక్క ఇంటికి చేరిన వాసంతి ప్రవర్తనను అర్థం చేసుకోక గీత, భాస్కర్‌ను, వాసంతిని అనుమానిస్తుంది, అవమానిస్తుంది. దానివల్ల వాసంతి ఇల్లు వదిలి వెళ్లిపోతుంది. భర్తద్వారా నిజం తెలుసుకున్న గీత పశ్చాతాపంతో తన బాబుకు వాసంతి తల్లిని చేయమని భర్తను కోరి మరణిస్తుంది. వాసంతి ఇంటినుంచి వెళుతూ, ఓ యాక్సిడెంట్‌ద్వారా తనను ప్రేమించిన రఘు ఇంటికి చేరుతుంది. అతని తండ్రి కోరికపై రఘును పెండ్లాడడానికి అంగీకరిస్తుంది. స్నేహితుడు సత్యంద్వారా విషయం తెలుసుకున్న భాస్కర్ పెళ్లికి వచ్చి ఓ ఉత్తరం ద్వారా తన బాబును గీత కోరిక ప్రకారం ‘పెళ్లికానుక’గా అందజేసి శూన్యంలోకి వెళ్లిపోతాడు.

హాస్యకథ: భాస్కర్ స్నేహితుడు సత్యం (రేలంగి), అతని భార్య కాంతం (గిరిజ), ఓ జంట. ఉద్యోగం ఉన్నట్టు అబద్దాలాడి పెళ్లి చేసుకొని, నిజం బయట పడ్డాక, కవి గంఢబేరుండం అని డాంబికాలు పలికి, అదీ అబద్ధం అని తేలాక బుద్ధి తెచ్చుకుని భార్యా, బిడ్డతో సహా సంచార టీ ఉద్యోగిగా పనిచేస్తూ ‘కధ చివరి మలుపు’కు సాయం పడతాడు.

సంగీత, సాహిత్యాలు: మిస్సమ్మ, విప్రనారాయణ, ప్రేమలేఖలు, శోభ చిత్రాలద్వారా గాయకుడుగా పేరుపొందిన ఎ.ఎం.రాజా, ఈ చిత్రానికి సంగీత దర్శకత్వం వహంచి ఈ చిత్రంలోని వైవిధ్య గీతాలను కూడా ఆలపించారు. వారి శ్రీమతి జిక్కి మాత్రం ఒక్కపాట ‘‘పులకించని మది పులకించు’తో సరిపెట్టుకోవాల్సి వచ్చింది. మిగిలిన పాటలను పి.సుశీల, ఎస్.జానకి పాడారు. ఈ చిత్రానికి ఆత్రేయ ‘తన మార్కు’ సంభాషణలు కూర్చారు. సముద్రాల సీనియర్, ఆత్రేయ, ఆరుద్ర, చెరువు ఆంజనేయశాస్ర్తీ, తమ సాహిత్యంతో మరుపురాని, మధురమైన పాటల పందిళ్ళు వేశారు. ప్రతి దీపావళికి వినిపించే ఆడే పాడే పసివాడా హ్యాపిసాంగ్ ఆత్రేయ రాయగా, విషాద గీతం ‘ఆడేపాడే పసివాడా’, ‘అమ్మలేని నినుచూడ’ గీతాన్ని చెరువు ఆంజనేయశాస్ర్తీ రాసారు. ప్రేమ భావాన్ని చూపులతోనే ఒలికిస్తూ, హృదయాలను కొల్లగొట్టే భాస్కర్(అక్కినేని)గా కళ్లతోనే బదులు పలికే అందాల హీరోయిన్ వాసంతి (బి.సరోజాదేవి)గా ముద్దు, ముద్దుమాటలు, వౌనంగా భాస్కర్‌ను ఆరాధించిన గీత (కృష్ణకుమారి), తమ అభినయంతో, ఈ ముక్కోణపు ప్రేమకధను రక్తికట్టించారు. ఈ చిత్రంలోని సన్నివేశాలు దర్శకుని ప్రతిభకు పట్టం కడుతూ అత్యంత సహజంగా చిత్రీకరింపబడ్డాయి.

దర్శకత్వ మెరుపులు: దర్శకునిగా శ్రీధర్ సింబాలిక్ షాట్స్ ఉపయోగించిన సన్నివేశాలు మొదట భాస్కర్, వాసంతి ఒకరిపై ఒకరికి ప్రేమ ఉదయించి, యుగళగీతం పాడబోయమేముందు వార్దిదరి సైకిళ్ల చక్రాలు ఒక్కవేపునకు తిరగటం, గీత, భాస్కర్‌ను ప్రేమించిందని తెలియగానే వాసంతి మనసులో ప్రేమా, కృతజ్ఞత ఈ రెండు విరుద్ధ భావాల సంఘర్షణ త్రాసులో చూపటం, ఒకవైపు ప్రేమ, రెండోవైపు అక్కపట్ల కృతజ్ఞత, చివరకు అక్కవైపు ముల్లు మొగ్గటం. అదేవిధంగా భాస్కర్‌ను తన అక్కతో పెళ్లికి ఒప్పించే సందర్భంలో వారిరువురి ప్రేమ గుర్తుగా భాస్కర్‌వద్ద పెరుగుతున్న కుండీలో మొక్క వాడిపోవటం, భాస్కర్ అనారోగ్యంతో ఉన్నప్పుడు నిండుగా ఉన్న మందు సీసా, వెనుకనుంచి గీత అతన్ని పైకి తీసి మందులు వేస్తూ సేవచేయటం, కోలుకుంటన్న సందర్భంగా సీసాలో మందు, ఖాళీ అవటం చూపారు. వాసంతితో ఆఫీసు మేనేజర్ రఘు తను ఆమెను ప్రేమిస్తున్నాను, పెళ్లాడమని కోరటం, వాసంతి తనకా ఊహలేదని తిరస్కరిస్తే రఘుచేతిలోని గాజు పేపర్ వెయిట్ గుండ్రంగా తిరిగే అతని చేతికి రావటం, ఈ సన్నివేశాన్ని గ్లాస్ టేబిల్‌పై వాసంతి, రఘుల ప్రతిబింబాలను చూపుతూ చిత్రీకరించారు.
భాస్కర్‌ను పెళ్లికి ఒప్పించే సన్నివేశం, కథాపరంగాను, ఇంచుమించు యధాతథంగా ‘‘మంచి కుటుంబం’’ చిత్రంలో వి.మధుసూదన్‌రావు, నాగేశ్వరరావు, కాంచనలపై చిత్రీకరించారు. పెళ్లి తరువాత భాస్కర్, గీతను ఆదరించే విషయం వాసంతి ఓ ఉత్తరం ద్వారా పరిష్కారం చూపితే ‘మంచి మనసులు’ చిత్రంలో ‘శాంతి’ (సావిత్రి) ఓ పాట ద్వారా మారుస్తారు. ఈ రెండు చిత్రాలకు అనుకోకుండా శ్రీధర్ మార్గ దర్శకులయ్యారు. పెళ్లయిన తరువాత భాస్కర్, గీత రైల్లో వెళుతుండగా ఒంటరిగా మిగిలిన వాసంతిపై ‘తీరెనుగా నేటితోనే తీయనిగాధ’ గీతం చివరలో ఒంటరిగా వెళుతున్న భాస్కర్‌పై ‘రిపీట్’ చేయటంతో కథాపరంగా ఈ పాట ప్రభావం ప్రేక్షకులపై చెరగని ముద్రవేసింది. వాసంతి, గీత చేత పెళ్లి కూతురుగా అలంకరింపబడి, భార్య సీమంతానికై వచ్చిన భాస్కర్‌కు ఎదురయినప్పుడు స్పందించబోయిన అతన్ని కళ్లతోనే వారించి, ఆ తరువాత ‘తన హృదయంలో అతని పట్ల పవిత్ర భావం తప్ప మరేది లేదని తనను చూసి ఎప్పుడు చలించనని’ భాస్కర్‌వద్ద వాగ్ధానం తీసుకునే సన్నివేశంలోనూ, వాసంతి పాత్రను, ఆదర్శవంతమైన, వ్యక్తిత్వంగల మహిళగా తీర్చిదిద్దారు. పదికాలాలపాటు గుర్తుండిపోయే ఉదాత్త కథను, మహోదాత్తంగా చిత్రీకరించిన దర్శకులు శ్రీధర్ చిరస్మరణీయుడు.