ఘంటసాల జ్ఞాపకాలు

రచన: శ్రీమతి ఘంటసాల సావిత్రి
పేజీలు: 240 వెల: 150
ప్రతులకు: నవోదయ బుక్‌హౌజ్ ,
కాచిగూడ ఎక్స్‌రోడ్స్
హైదరాబాద్-500 027




‘మనం పిల్లలు గలవాళ్లం..జాగ్రత్త పడకపోతే ఎలా చెప్పండి’
‘మీరు ఆ సినిమా తీయకండి..నష్టపోతారు’
‘ఆయన చుట్టతాగి పాడారు’
‘నా దగ్గర ఎప్పుడూ ఒకటి ఎక్‌స్ట్రా ఉంటుంది..ఇచ్చేవాడ్ని కదా’
‘అందరం బతికేందుకు వచ్చాం..అందరూ బతకాలి..అందరికీ అవకాశాలు రావాలి’
ఈ మాటల్లోతుల్లోకి ఎంతగా వెళితే అంతగా అర్ధం దొరుకుతుంది. ఓ వ్యక్తుల మధ్య అనుబంధానికి ఆనాడు ఎంత ప్రాధాన్యత ఉండేదో తెలుస్తుంది. పది మంది మంచి కోరుకోవాలన్న వారి విశాల హృదయం గోచరమవుతుంది.
తెలుగుపాటకు మారుపేరుగా, మాధుర్యానికి నిలువెత్తు నిదర్శనంగా భాసిల్లిన ఘంటసాల గురించి ఎంత చెప్పినా అది ఇసుమంతే అవుతుంది. ఓ వ్యక్తి జీవితాన్ని అతి సమీపం నుంచి చూసిన అనుభూతి కలగాలంటే..ఆయన గురించి సన్నిహితులే రాయాలి. ఆత్మీయులు రాస్తే ఇంకా హృదయానికి హద్దుకుంటుంది. మరి ఆయన జీవిత భాగస్వామే రాస్తే..ఆమె తన అనుభవాలను, అనుబంధాన్ని ఆవిష్కరిస్తే అది కచ్చితంగా ‘ఘంటసాల జ్ఞాపకాలు’అవుతుంది. ఘంటసాల జీవితాన్ని అణువణువూ ఆవిష్కరించిన ఓ అపురూపమైన పుస్తకమే అవుతుంది. ఘంటసాల పేరుచెబితేనే మది పులకిస్తుంది. మనసు పరవళ్లు తొక్కుతుంది. హృదయం పాటల పూదోటలో ఆహ్లాదంగా విహరిస్తుంది. వందలు కాదు వేల పాటలతో తెలుగునాట వాణిని బాణిని వినిపించిన ఘనాపాటి అయన. ఘంటసాల గురించి ఎంత చెప్పినా తక్కువే. ఇంకా మిగిలే ఉంటుంది. ఎందుకంటే..సంగీత ప్రపంచంలో ఆయన స్థానం అంత ఉన్నతమైనది. ఎవరు అందుకోలేనంత సమున్నతమైనది. అలాంటి ఘంటసాల గురించి తెలుసుకోవాలన్న ఆసక్తి..ఇంకా తెలుసుకోవాలన్న జిజ్ఞాస ప్రతి తెలుగువాడికి ఉంటుంది. పాట విలువ తెలిసిన ప్రతి సంగీత హృదయుడికి ఉంటుంది. ఎన్నో పుస్తకాలు వచ్చినా అన్నీ ఘంటసాల పాట గురించి ఆయన సంగీత పటిమ గురించే చెప్పాయే తప్ప అసలు ఘంటసాల అంటే ఏమిటో చెప్పలేదు. అలా చెప్పే ప్రయత్నమే ‘ఘంటసాల జ్ఞాపకాలు’..ఆయన జీవితాన్ని, వ్యక్తిత్వాన్ని, ప్రతిభను, మానవత్వాన్ని అనేక కోణాల్లో రంగరించిన ఈ పుస్తకం ఆద్యంతం ఆసక్తి కలిగించే విధంగా చదివిస్తుంది. విజయనగర వీధుల్లో విహరించిన నాటి నుంచి సినీవీనీలాకాశంలో ధృవతారగా మారిన ఓ గంధర్వగాయకుడిగా ఎదిగిన ఘంటసాలను మనకు పరిచయం చేస్తుంది. ఆయన వ్యక్తిత్వానికి, ఆదర్శనీయతకు అద్దం పడుతుంది. ముఖ్యంగా ఈ పుస్తకం అంతా ఒక అత్మీయభావనతోనే సాగుతుంది. మనకు ఎక్కడా పుస్తకం చదువుతున్నామన్న ధ్యాస ఉండదు. ఓ ప్రపంచంలో విహరిస్తున్నామన్న ఆనుభూతే ఉంటుంది. ఎన్టీఆర్, ఏఎన్నార్ వంటి వారితో ఆయన అనుబంధానే్న కాదు.. ఆత్మీయతాబంధాన్ని కూడా ఈ పుస్తకం ఆవిష్కరిస్తుంది. ఘంటసాల పాటల గురించి చెప్పడమంటే సూర్యుడికి దివిటీ పట్టడమే అవుతుంది. కాబట్టి ఆ పాటల జోలికి పోకుండా వ్యక్తిగా ఘంటసాల ఏమిటో, మనిషిగా ఆయన మానవీయ దృక్కోణాలేమిటో ఈ పుస్తకంలో దృష్టాంతాల సహితంగా వివరించారు. తోటి గాయకులకు ఘంటసాల అవకాశం ఇచ్చేవారు కారన్న అపప్రధను కూడా ఈ పుస్తకం ద్వారా ఆయన భార్య తొలగించేందుకు ప్రయత్నించారు. ఘంటసాలకు సంబంధించి వచ్చిన పుస్తకాలన్నింటికంటే కూడా ఈ పుస్తకానికి ఓ ప్రత్యేకత ఉంది. ఎందుకంటే..ఆయన జీవితం ఇందులో ఉంది. గాయకుడిగా ఎదిగేందుకు ఆయన పడ్డ తపన, ఆరాటం ఎంతటిదో ఈ పుస్తకం చెబుతుంది.